ปาสาทํ โสว กาเรสิ, ปสาทาวหมุตฺตโม;
ฉาเทสิ โลหปาสาทํ, ถูปารามฆรํ ตถาฯ
[66]
ถูปาราเม จ ปาสาทํ กตฺวา’ทา ปํสุกูลินํ;
ชิณฺณกํ ปฏิสงฺขาสิ ฉตฺตํ เจติยมุทฺธนิ;
พหโว ชิณฺณกาวาเส ตตฺเถว ปฏิสงฺขริฯ
[เอตฺถ มาณวมฺมสฺส รชฺชกถาย อูนตา ทิสฺสติฯ อิโต ปฏฺฐาย อคฺคโพธิสฺส รชฺชปฏิพทฺธา กถา วิร ขายติฯ]
ฉจตฺตาลีสติม ปริจฺเฉท
[1]
...วาสํ-กตฺวา สุลภปจฺจยํ;
ทาสิ ธมฺมรุจินํ โส, ราชินี ทีปกมฺปิ จฯ
[2]
กาเรตฺวาน ปริจฺเฉทํ, มหาเนตฺตาทิ ปาทิกํ;
เตสเมว อทา โกฬุ-วาเต โส เทวติสฺสกํฯ
[3]
วหตฺถเล จ โส กตฺวา, กทมฺพโคนนามกํ;
เทวปาฬิมฺหิ กตฺวาน, คีริวฺหนครํ ตถาฯ
[4]
กตฺวา อนฺตรโสพฺภมฺหิ, เทวนามํ วิหารกํ;
ราชมาติกมารามํ, กตฺวา’ทา ปํสุกูลินํฯ
[5]
โคกณฺณกวิหาเร’กา, ปธานฆรเมว จ;
ชิณฺณเคหญฺจ กาเรสิ, วฑฺฒมานกโพธิยาฯ
[6]
สงฺฆมิตฺตวฺหเย เจว, อญฺญตฺถ จ มหายโส;
ตตฺถ ตตฺถ วิหาเรสุ, นวกมฺมมการยิฯ
[7]
ฉพฺพีสติ สหสฺสานิ, สุวณฺณานํ สมปฺปิย;
ชิณฺณานิ ปฏิสงฺขาสิ, ราชา เจติยปพฺพเตฯ
[8]
ตาลวตฺถุวิหารญฺจ, กาเรตฺวา ปณฺณภตฺตกํ;
วิหารสฺส มหาเสน-นรินฺทวฺหสฺส ทาปยิฯ
[9]
โคณฺฑิคามิกวาปิญฺจ, ฉินฺนํ พนฺธิ ยถา ปุรา;
ทานภณฺฑญฺจ โส สพฺพํ, สพฺเพสํ ทาสิ ปาณินํฯ
[10]
อุโปสถํ อุปวสติ, สทฺธิํ ทีปชเนหิ โส;
ธมฺมญฺจ เตสํ เทเสติ, ทาตุํ โลกุตฺตรํ สุขํฯ
[11]
กมฺมํ โสวคฺคิยํ ตสฺส, รชฺเช สพฺโพ สมาจริ;
ยํ กโรติ มหีปาโล, ตํ ตสฺส กุรุเต ชโนฯ
[12]
ตสฺมา ราชา มหาปญฺโญ, ธมฺมเมว สมาจเร;
โส นิวุตฺถนิวุตฺถมฺหิ, ฐาเน โหติ มหายโสฯ
[13]
สมฺปตฺตปริวาโร จ, อนฺเต คจฺฉติ นิพฺพุติํ;
อตฺตตฺถญฺจ ปรตฺถญฺจ, ตสฺมา ปสฺเสยฺย พุทฺธิมาฯ
[14]
อตฺตนา ยทิ เอเกน, วินิเตน มหาชนา;
วินยํ ยนฺติ สพฺเพปิ, โกตํ นาเสยฺย ปณฺฑิโตฯ
[15]
ปโยโค โย หิ สตฺตานํ, โลหทฺวย หิตาวโห;
โส เตน อกโต นตฺถิ, รตฺตนฺทิวมตนฺทินาฯ
[16]
อตฺตโน โส นิวตฺถานิ, วตฺถานิ สุขุมานิ จ;
ปํสูกูลิกภิกฺขูนํ, จีวรตฺถาย ทาปยิฯ
[17]
อฏฺฐานวินิโยโคปิ, สงฺคโห วา วิรูปโก;
สาวชฺโช ปริโภโค วา, ตสฺส นาโหสิ สพฺพโสฯ
[18]
เย เย สตฺตา ยทา หารา, เตสํ ตํ ตํ สทาปยิ;
เย เยน สุขี โหนฺติ, เต เต เตน สุขาปยีฯ
[19]
เอวํ ปุญฺญานิ กตฺวาน, ฉพฺพสฺสานิ นราธิโป;
อคมา เทวราชสฺส, สนฺติกํ สนฺติยาวโหฯ
[20]
อถ ตสฺส นุโช ราชา, กสฺสโป โหติ ขตฺติโย;
สมตฺโถ รชฺชภารสฺส, วหิตุํ ปุพฺพวุตฺติโนฯ
[21]
ปิตา วิย นิยํ ปุตฺตํ, โส สงฺคณฺหิ มหาชนํ;
ทาเนน เปยฺยวชฺเชน, อตฺถสฺส จริยาย จฯ
[22]
ฐานนฺตรญฺจ ทาเปสิ, ตสฺส ตสฺส ยถารหํ;
สยํ ภุญฺชิตฺถ โภเคปิ, สพฺพทุกฺขวิวชฺชิโตฯ
[23]
คีหินญฺเจว ภิกฺขูนํ, พฺรหฺมณานญฺจ ขตฺติโย;
วตฺตาปยิ สกาวาเร, มาฆาตญฺเจว การยิฯ
[24]
มจฺฉติตฺเถ ทุเว เจว, อาวาสํ เหฬิคามกํ;
วณิชฺชคามมารามํ, กสฺสปาทีคิริํ ตถาฯ
[25]
ตถา อมฺพตนวฺหญฺจ, ปธานฆร มุตฺตมํ; โภคคามญฺจ...
[เอตฺถกสฺสปสฺส รชฺชปฏิพทฺธาย กถาย อูนตา ทิสฺสติฯ]
[26]
เตสํ สพฺพกนิฏฺโฐปิ, มหินฺโท นาม ขตฺติโย;
สมฺปตฺตรชฺโช นาโหสิ, ราชา รชฺช ธุรนฺธโรฯ
[27]
ตสฺสปิ กิร นิลวฺโห, สหาโย จีรสตฺถุโต;
มโต ปุพฺเพว ตสฺมา, โส สรนฺโต ตํ น อิจฺฉิตํฯ
[28]
อโหรชฺชมฺปิ ทีปมฺหิ, น มญฺญิตฺถ สุขาวหํ;
อภาเวน สหายสฺส, สหายา’ตีว ทุลฺลภาฯ
[29]
เตเนว วุตฺตํ มุนินา, ธมฺมา เยเกจิ โลกิยา;
ตถา โลกุตฺตรา เจว, ธมฺมา นิพฺพานคามิโนฯ
[30]
กลฺยาณมิตฺตํ อาคมฺม, สพฺเพ เต โหนฺติ ปาณินํ;
ตสฺมา กลฺยาณมิตฺเตสุ, กตฺตพฺโพ’ติ สทา ทโรฯ
[31]
อาทิปาโทว โส ตสฺมา, หุตฺวา รชฺชํ วิจารยิ;
ปาเลตุํเยว ทีปมฺหิ, ชิวนฺโต วิย ปาณิโนฯ
[32]
กสฺสปสฺส สภาตุสฺส, ปุตฺตํ โส อคฺคโพธิกํ;
ฐเปตฺวา โอปรชฺชมฺหิ, ทตฺวา โภคมนปฺปกํฯ
[33]
เทสํ ทตฺวาน ปาจินํ, วสิตุํ ตตฺถ เปสิย;
เทสํ ทกฺขิณมาทาสิ, ราช ปุตฺตสฺส อตฺตโนฯ
[34]
มหาปาฬิมฺหิ ทานญฺจ, ทาเปสิ ทสวาหณํ;
สพฺเพ โภเค สเม’กาสิ, ยาจนานํ สห’ตฺตนาฯ
[35]
อทตฺวา ยาจกานํ โส, นุ กิญฺจิ ปริภุญฺชติ;
ภุตฺตํ วา สติยา เทติ, ทฺวิ คุณํ อตฺตภุตฺตโตฯ
[36]
สกนามํ สกาเรสิ, ภิกฺขุนี น มุปสฺสยํ;
ปาทานครคลฺลญฺจ, อาราม มริยาทกํฯ
[37]
มหินฺทตฏมารามํ, สมฺปตฺต จตุปจฺจยํ;
อญฺญมฺปิ พหุธา กาสิ, ปุญฺญํ ปุญฺญคุเณรโตฯ
[38]
ติณี วสฺสานิ กาเรตฺวา, รชฺชเมว มหามติ;
คเวสนฺโต สหายํ’ว, เทวโลกมุปาคมิฯ
[39]
วสนฺโต ทกฺขิเณ เทเส, อคฺคโพธิ กุมารโก;
เกนาปิ กรณีเยน, นครํ อาคโต อหุฯ
[40]
ตสฺมิํ ตตฺถ วสนฺตมฺหิ, อาทิปาโท มหินฺทโก;
มโต อาสิ ตโต ตสฺส, รชฺชํ หตฺถคตํ อหุฯ
[41]
โส ตํ หตฺถคตํ กตฺวา, สณฺฐเปตฺวาน สาสนํ;
ปาจิน เทสปติโน, อคฺคโพธิสฺส เปสยิฯ
[42]
ส อาคนฺตฺวา อหุ ราชา, สิลาเมโฆติ สญฺญิโต;
โอปรชฺเช กุมารญฺจ, อภิสิญฺจิตฺถ ภูปติฯ
[43]
โส ราชา นํ นิโยเชตฺวา, จินฺตา ภารํ วิมุญฺจิย;
โภเค ภุญฺชถ ตุมฺเหติ, สยํ รชฺชํ วิจารยิฯ
[44]
ยถาโยคํ ชนสฺเสส-กาสิ นิคฺคหสํคเห;
เทเส อุพฺพินยํ สพฺพํ, มคฺคํ ปาเปสิ จกฺขุมาฯ
[45]
เอวํ เตสุ วสนฺเตสุ, โอตารํ ปาปกมฺมิโน;
น ลภนฺตา วิจินฺเตสุํ, ภินฺทิตพฺพา อิเม อิติฯ
[46]
ราชานมุปสงฺกมฺม, อโวจุํ ปิสุนํ รโห;
ตุวํ ราชาสิ นาเมน, ราชา อญฺโญ สภาวโหฯ
[47]
อุปราชา อยํ รชฺชํ, คณฺหิสฺสติ มหาชนํ;
สงฺคยฺห น จิเรเนว, โหติ ราชา น สํสโยฯ
[48]
ตํ สุตฺวาน มหีปาโล, ปริภิชฺชิ กุมารเก;
กุมาโรปิ วิธิตฺวา ตํ, โจโร หุตฺวาน ราชินฺโทฯ
[49]
ปลายิตฺวา สกํ เทสํ, สงฺคณฺหิตฺวา ตหิํ ชเน;
มหนฺตํ พลมาทาย, กาตุํ สงฺคาม มารภิฯ
[50]
กทลฺยาทินิวาตมฺหิ, สงฺคาโม ภิํสโน อหุ;
คโต ตตฺถ ปราชิตฺวา, กุมาโร มลยํ วโสฯ
[51]
ตโต ราชา กตญฺญู โส, อุปการํ สภาตุโน;
จินฺเตตฺวา รชฺชทานาทิํ, ปริเทวิตฺถ ปากฏํฯ
[52]
กุมาโรปิ จ ตํ สุตฺวา, อโหสิ มุทุจิตฺตโก;
เอวํ เต อญฺญมญฺญสฺส, สินิทฺธนฺตํ ปกาสยุํฯ
[53]
ราชา คนฺตฺวา สยํเยว, มลยํ เอกโก วํโส;
กุมารํ ตํ สมาทาย, อาคมิตฺถ สกํ ปุรํฯ
[54]
โหติ นิสฺสํสยํ [เอวํปิ จิตฺโต] อตีว โส;
วิวาหํ เตน กาเรสิ, ธีตรํ สงฺฆนามิกํฯ
[55]
ตาย สทฺธิํ วสนฺโต โส, วิสฺสตฺโถ เตน ราชินา;
ปหารํ ตาย ปาทาสิ, ทุฏฺโฐ โทสมฺหิ กิสฺมิํจิฯ
[56]
ปิตรํ สา อุปาคมฺม, กรุณํ โรทิตมฺปติ;
อการเณ มํ มาเรติ, ทินฺโน โว สามิโก อิติฯ
[57]
โสปิ ตํ สุตมตฺเตว, ทุกฺกตํ วต เม อิติ;
ปพฺพาเชสิ ลหุํ คนฺตฺวา, ภิกฺขูนี น มุปสฺสยํฯ
[58]
อคฺคโพธิสนาโมถ, ตสฺสา มาตุล ปุตฺตโก;
สุจิเรเนว กาเลน, ตสฺสํ สา รตฺตมานโสฯ
[59]
กาโล’ยนฺติ วิทิตฺวาน, ตมาทาย ปลายิตุํ;
อญฺญโต ตํ คเหตฺวาน, คโต เอโกว โรหณํฯ
[60]
อคฺคโพธิํ นรินฺโท โส, อคฺคโพธิ นมาทิย;
อคฺคโพธิํ นิหนฺตุํ ตํ, โรหณํ ตมุปาวีสิฯ
[61]
อคฺคโพธิ นิเสเธตฺวา, อคฺคโพธิํ สภาตรํ;
อปเร ปพฺพเต หนฺตุ-มคฺคโพธิํ สยํ คโตฯ
[62]
กสิณํ โรหณํ หตฺถ-คตํ กตฺวา มหา พโล;
ยุชฺฌิตฺวา เตน ตํ คณฺหิ, ภริยํ สงฺฆมตฺตโนฯ
[63]
ตโต ปฏฺฐาย สุขิตา, สมคฺคา เต ตโย ชนา;
วิสฺสฏฺฐา อญฺญมญฺเญสุ, วิหริํสุ ยถารุจิํฯ
[64]
วาปารนิํ อการามํ, ตถา มาณคฺคโพธิกํ;
สภตฺตุทฺเทสโภคญฺจ, วิหาเร อติยุตฺตเรฯ
[65]
หตฺถิ กุจฺฉิวิหาเร จ, วิหาเร ปุน ปิฏฺฐิเก;
มหาทีปริเวเณ จ, ปาสาเท วาหทีปเกฯ
[66]
ถูปารามมฺหิ เคหสฺส, ทฺวาเร จ ปริชิณฺณเก;
กาสิ ปากติกํ ตตฺถ, ถมฺเภ จ ปริวตฺตยิฯ
[67]
เอวํ กตฺวาน ปุญฺญานิ, ปุญฺญานิ จ ยถาพลํ;
จตฺตาลีสติเม วสฺเส, ยถากมฺม มุปาคมิฯ
[68]
อโถปราชา ราชา’สิ, อคฺคโพธิ สิรีธโร;
ตนโย โส มหินฺทสฺส, อาทิปาทสฺส ธีมโตฯ
[69]
สาสนมฺปิ จ โลกญฺจ, สงฺคณิตฺถ ยถารหํ;
โอปรชฺเช’ภิสิญฺจตฺถ, มหินฺทํ ปุตฺตมตฺตโนฯ
[70]
มหาโพธิสฺส กาเรสิ, ฆรํ ชิณฺณํ นวํ ถิรํ;
อาราเม ทฺเว จ กาเรสิ, กฬนฺทํ มลฺลวาตกํฯ
[71]
ธมฺมกมฺเมหิ สกฺกจฺจํ, โสเธสิ ชินสาสนํ;
วินิจฺฉนนฺโต ธมฺเมน, ฉินฺทิ กูฏฏฺฏการเกฯ
[72]
เภสชฺชญฺจ คิลานานํ, มงฺคลํ จาวมงฺคลํ;
ลงฺกาทีปมฺหิ สกเล, สยเมว วิจารยีฯ
[73]
สลากภตฺตํ ทาเปสิ, นิกายตฺตย วาสินํ;
โภชนํ ปํสุกูลีนํ, อตฺตโยคฺคํ มหารหํฯ
[74]
เอวมาทีนิ กตฺวาน, ปุญฺญานิ สสยํ วสี;
จุโต’สิ ฉหิ วสฺเสหิ, ปุลตฺถินคเร วสํฯ
[75]
ตโต ปุพฺเพว ตสฺสาสิ, ปุตฺโต โส ยุวราชโก;
มโต กิร ตโต รชฺชํ, อปุตฺตํ ตํ ตทา อหุฯ
[76]
ปุตฺโต มหินฺโท นามา’สิ, สิลา เมฆสฺส ราชิโน;
รชฺชโยคฺโค มหาปุญฺโญ, โลกสงฺคณฺห นกฺขโมฯ
[77]
ตสฺส ชาตทิเนเยว, ราชา นกฺขตฺตปาฐเก;
ปุจฺฉิตฺวา รชฺชโยคฺโคติ, สุตฺวา เตหิ วิยากตํฯ
[78]
ทตฺวา เตสํ ธนํ สาธุ, ปวตฺติํ ตํ นิคูหยิ;
อถ นํ โส วยปฺปตฺตํ, กตฺวา เสนาปติํสกํฯ
[79]
รชฺชํ วสฺเสว กตฺวาน, สพฺพํ หตฺเถ สยํวสี;
โส ธมฺเมน วิจาเรสิ, ราช กิจฺจํ มหามติฯ
[80]
มเตปิ ตสฺมิํ ตสฺมา โส, อคฺคโพธาภิธานิโน;
เสนาปจฺจํ น คณฺหิตฺถ, นยญฺญู ตสฺส หตฺถโกฯ
[81]
ตทา เกนจิ คนฺตฺวา โส, กรณีเยน ราชิโน;
สมุทฺทตีเร วสติ, มหาติตฺถมฺหิ ปฏฺฏเนฯ
[82]
สุตฺวา โส จูฬปิตุโน, มรณํ เวคสา’คมา;
โจรา รชฺชํ คเหตฺวาน, นาเสยฺยุํ นครํ อิติฯ
[83]
ตโต อุตฺตรเทสมฺหิ, มณฺฑลีกา สรฏฺฐิยา;
อจฺฉินฺทิตฺวาน ตํ เทสํ, ฉินฺนราชกรํ กรุํฯ
[84]
โส ตํ สุตฺวา มหาเสโน, คนฺตฺวา อุตฺตรเทสกํ;
สพฺเพ นิมฺมถยิตฺวาน, มณฺฑลี เกสรฏฺฐิเยฯ
[85]
คนฺตฺวา รญฺโญ มตฐานํ, ทิสฺวา เทวิํ ปโรทิย;
อสฺสาเสตฺวา ยถากาลํ, อิทํ วจนมพฺรวิฯ
[86]
มาจินฺเตสิ มหาเทวี, มโต เม สามิโก อิติ;
รกฺขิสฺสามิ อหํ ทีปํ, ตุมฺเห รชฺชํ กริสฺสถฯ
[87]
ตุณฺหิภูตา’ธิวาเสตฺวา, ปิยสา ปาปพุทฺธิกา;
รโห โยชยี ตํ หนฺตุํ, วตฺถุกามา ยถารุจิํฯ
[88]
เสนาปติ ตํ ญตฺวาน, ตสฺสา’รกฺขํ วิธาย โส;
ตํ ปกฺขิเยหิ ยุชฺฌิตฺวา, ปลาเปสิ มหาชนํฯ
[89]
ตโต เทวิํ สพนฺเธตฺวา, ปกฺขิปิตฺวาน ยานเก;
อาทาย ตํ ปุรํ คนฺตฺวา, รชฺชํ คณฺหิ สสาธนํฯ
[90]
อตฺถิ ทปฺปุฬ นาโม’ปิ,
สิลา เมฆสฺส ราชิโน;
ภาคิเนยฺโย มหาเสโน,
อาทิปาโท มหา ธโนฯ
[91]
โส เสนํ สนฺนิปาเตตฺวา, วสนฺโต กาฬวาปิยํ;
กาตุํ สงฺคาม มาคญฺฉิ, สงฺคคามปฺปเทสกํฯ
[92]
เสนาปติ ปวตฺติํ ตํ, สุตฺวา สมฺปนฺนวาหโน;
เทวิญฺจ ตํ สมาทาย, อคมา ตตฺถ สชฺชุกํฯ
[93]
เตสํ ตตฺถสิ สงฺคาโม, อุภินฺนํ โลมหํสโน;
อาทิปาโท ตทาเสนํ, โอหียนฺตํ สเมกฺขิยฯ
[94]
ปลายิตฺวา อารุหิตฺถ, อจฺฉเสลํ สวาหโน;
ปลาเปตฺวาน ตํ ตตฺถ, เสนาปติ สุขํ วสิฯ
[95]
สุญฺญํติ นครํ สุตฺวา, มณฺฑลีกาปิ อุตฺตเร;
เทเส สพฺเพ สมาคมฺม, อคฺคเหสุํ ปุรํ ตทาฯ
[96]
โส หิ เต ปฏิพาเหสิ, สูโร ธีรปรกฺกโม;
อถาคมฺม ปุรํ รชฺชํ, วิจาเรสิ ยถานยํฯ
[97]
ภิกฺขุสงฺฆสฺส โลกสฺส, มจฺฉานํ มิคปกฺขินํ;
ญาตีนํ พลกายสฺส, กตฺตพฺพํ สพฺพมาจริฯ
[98]
ปจฺฉา อนุ พลปฺปตฺโต, ทปฺปุโล มลยํ คโต;
ภาคิเนยฺโย ทุเว เจว, ปกฺโกสิตฺวาน โรหณาฯ
[99]
รฏฺเฐ ชนปเท สพฺเพ, อาทาย พหุวาหโน;
รตฺติยํ ปุรมาคมฺม, สมุทฺโท วิย โอตฺถริฯ
[100]
พลกาโย ปุรํ รุนฺธิ, อุคฺโฆเสนฺโต สมนฺตโต;
เหสิเตน ตุรงฺคานํ, โกญฺจนาเท นทนฺตินํฯ
[101]
ตาฬาวจร สทฺทานํ, กาหฬานํ รเวน จ;
คชฺชิเตน ภฏานญฺจ, อากาสํ น ตทา ผลิฯ
[102]
ตทา เสนาปติ ทิสฺวา, มหาเสนํ ปโมทิย;
อาโรเจสิ อวตฺติํ ตํ, พลกายสฺส อตฺตโนฯ
[103]
ราชปุตฺตา ตโย เอเต, มหนฺตํ พลมาทิย;
นครํ โน’ปรุนฺธิํสุ, กินฺตุ กตฺตพฺพ เมตฺถ โวฯ
[104]
เอวํ วุตฺตา ตมาหํสุ, สูรา ตสฺส รณตฺถิโน;
เทวาเสวา ทิเนเยว, เสวกานํ น ชีวิตํฯ
[105]
เอวํ ภูเต สเจ กาเล, โอหีนา ชีวิภตฺถิโน;
โปเสสิ สามิ กิํ กาล-เมตฺตกํ โน ยถา สุขํฯ
[106]
วุตฺเต เอวํ สอุสฺสาโห, พลํ สชฺชิย รตฺติยํ;
อุคฺคเต อรุเณ หตฺถิ-มารุยฺห กตกมฺมกํฯ
[107]
ทฺวาเรเน’เกน นิกฺขมฺม, ปตนฺโต อสนี วิย;
สทฺธิํ โย ธสหสฺเสหิ, สงฺคามํ กาสิ ทุสฺสหํฯ
[108]
พลํ ตํ อาทิปาทสฺส, นิปฺโผเฏตฺวา ตโต ตโต;
สนฺนิปาติย เอกชฺฌํ, นิยตฺติํ สมฺปเวทยิฯ
[109]
หตาวเสเส อาทาย, อาทิปาโทปิ ทปฺปุโฬ;
ปุพฺพณฺเหว ปราชิตฺวา, ปลายิตฺวา’ค โรหณํฯ
[110]
ราชปุตฺเต ทุเว เจว, โรหณมฺหา ตทา คเต;
ชีวคฺคาหํ สคาเหตฺวา, เต อาทาย ปุรํ คโตฯ
[111]
เอวํ ปตฺตชโย สูโร, ทีเป ชาเต นิรากุเล;
ปาจินเทสํ สาเธตุํ, เปสยิตฺถ สวาหเนฯ
[112]
เตปิ คนฺตฺวาน เทสํ ตํ, อุตฺตรํ เทสเมว จ;
สาธยิตฺวา’จิเรเนว, สงฺคเหสุํ มหาพลํฯ
[113]
ราชาปิ ตํ มหาเทวิํ, ภริยํ กาสิ อตฺตโน;
ปริจฺจตฺตุญฺจ มาเรตุํ, น สกฺกายนฺติ จินฺติยฯ
[114]
เตสํ สํวาสมนฺวาย, คพฺโภ อาสิ ปติฏฺฐิโต;
ปุตฺตํ วิชายิ สาธญฺญ-ปุญฺญลกฺขณสญฺญุตฺตํฯ
[115]
รญฺโญ สา’ติปิยา อาสิ, ตโต ปฏฺฐาย โสปิ โข;
ปุตฺตสฺส ตสฺส ปาทาสิ, โอปรชฺชํ สโภคิยํฯ
[116]
ฐิตา ปาจินเทสมฺหิ, อาทิปาทา นิสมฺมตํ;
วินา โส’ยนฺติ อมฺหากํ, อุโภ หุตฺวาน เอกโตฯ
[117]
ทฺวีสุ ปสฺเสสุ เสนญฺจ, สมาทาย มหาธนํ;
สนฺธิํภาตรมาหูย, กตฺวาโรหณ เทสโตฯ
[118]
คงฺคาตีรมฺหิ วาสํ เต, กปฺปยิํสุ มหพฺพลา;
ราชา สพฺพํ นิสมฺเม’ตํ, มณฺฑลีเก ตหิํ ตหิํฯ
[119]
อาราเธตฺวา คเหตฺวาน, ทุฏฺเฐ มาริย เกจน;
รกฺขํ ทตฺวาน นคเร, กตฺตพฺพํ สาธุโยชิยฯ
[120]
มหาเสนงฺคมาทาย, มเหสิญฺจ ตมาทิย;
ขนฺธาวารํ นิเวเสติ, มหุมฺมารมฺหิ คามเกฯ
[121]
ตสฺสาคมนมญฺญาย, อาทิปาทาปิ เต ตโย;
โกวิฬารวฺหเย คาเม, มหายุทฺธํ ปวตฺตยุํฯ
[122]
อถ ราชา มหาเสโน, สมุคฺฆาเตสิ ตํ พลํ;
ทปฺปุโฬ โส ปลายิตฺถ, อาทิ ปาทา ทุเว หตาฯ
[123]
ตตฺถาปิ ลทฺธวิชโย, ปุรมาคมฺมภูมิโป;
ราชกิจฺจํ วิจาเรสิ, มหาทานํ ปวตฺตยิฯ
[124]
มหาโพธิ ทุมินฺทสฺส, มหาเจติตฺตยสฺส จ;
ธาตูนมฺปิ จ สกฺกจฺจํ, มหาปูชามการยีฯ
[125]
โรหณํ สมุปาคมฺม, ทปฺปุโฬ โส ตมาคโต;
พลํ สมฺปฏิปาเทสิ, ยุชฺฌิตุํ ปุน ราชินาฯ
[126]
ราชา โส ปุตฺตนตฺตานํ, เทสํ กาตุํ นิรากุลํ;
ถูปารามมฺหิ สพฺเพปิ, สนฺนิปาติย ภิกฺขโวฯ
[127]
อญฺเญปิ จ มหาปญฺเญ, ยุตฺตา ยุตฺติวิสารเท;
ราชธมฺเมสุ สพฺเพสุ, นิปุโณ นยโกวิโทฯ
[128]
อาโรเจตฺวา ปวตฺติํ ตํ, เตหิ สมฺมา ปกาสิโต;
จตุรงฺคมหาเสโน, สพฺพูปกรณานุโคฯ
[129]
ทีเป สพฺพตฺถ โยเชตฺวา, กตฺตพฺพํ นคเรปิ จ;
นิกฺขนฺโต น จิเรเนว, อคมา มารปพฺพตํฯ
[130]
สมฺมทฺทิตฺวาน ตํ เทสํ, ขิปฺปํ ปพฺพตมารุหี;
ตํ ทิสฺวา โรหเณ สพฺเพ, ภีตา ตํ วสมาคมุํฯ
[131]
ตโต สนฺธิํ กริตฺวาน, ทปฺปุเฬน สทปฺปโก;
หตฺถี อสฺเส จ มณโย, คเหตฺวา ตสฺส หตฺถโตฯ
[132]
คาฬฺหคงฺคญฺจ กตฺวาน, สีมํ โรหณโภคินํ;
โอรคงฺคํ สมาทาย, ราชโภคมการยิฯ
[133]
ทีปเมวํ มหาเตโช, กตฺวา วิคตกณฺฏกํ;
เอกาตปตฺโต อาคมฺม, ปุรํ วสิ ยถาสุขํฯ
[134]
ปริเวณํ สกาเรสิ, ราชา ทามวิหารกํ;
ตถา สนฺนิรติตฺถญฺจ, ปุลตฺถินคเร วิภูฯ
[135]
มหาเลขญฺจ กาเรสิ, ปริเวณมภยา จเล;
ตถา รตนปาสาทํ, ตเถว สุมโนหรํฯ
[136]
อเนกภูมํ กาเรตฺวา, เวชยนฺตมิวาปรํ;
ตถา สตสหสฺเสหิ, ตีหิ เจว มหาธโนฯ
[137]
ชมฺโพนทตุวณฺณสฺส, สหสฺเสหิ จ สฏฺฐิหิ;
พิมฺพํ สตฺถุสฺส กาเรตฺวา, นคฺฆํ จูฬามณิยุตํฯ
[138]
ปูชํ สพฺโพปหาเรน, กาเรตฺวาน มหารหํ;
ปาสาทมหเน สพฺพํ, รชฺชํ โอสฺสชฺชิ อตฺตโนฯ
[139]
โพธิสตฺตญฺจ กาเรตฺวา, ราชานํ สุมโนหรํ;
สณฺฐปิตฺถสิลา เมเฆ, จารุํ ภิกฺขูนุปสฺสเยฯ
[140]
ถูปารามมฺหิ ถุปสฺส, กาสิ โสวณฺณกญฺจุกํ;
ปฏฺฏํ กตฺวา วิจิตตฺถํ, รชตํ อนฺตรนฺตราฯ
[141]
ตสฺมิํเยว จ ปาสาทํ, ปริชิณฺณํ สการยิ;
อภิธมฺมํ กถาเปสิ, การาเปตฺวา มหามหํฯ
[142]
มหาเถเรน สติมา, เหมสาลินิวาสินา;
ตตฺถ โปกฺขรณิญฺจสฺส, ปริโภคาย การยิฯ
[143]
ชิณฺเณ เทวกูเล กตฺวา, พหุเก ตตฺถ ตตฺถ โส;
เทวานํ ปฏิมาโย จ, การยิตฺถ มหารหาฯ
[144]
พฺราหฺมณานญฺจ ทตฺวาน, ปจฺจคฺฆํ ราชโภชนํ;
ปาเยสิ ขีรํ โสวณฺณ-ตฏฺฏเกหิ สสกฺขรํฯ
[145]
อุสเภ ปงฺคุลานญฺจ, ชีวิกญฺจ สทาปยี;
ทมิฬานนฺตุ ปาทาสิ, อสฺเส โคเณ อคณฺหตํฯ
[146]
อนาถา เย สลชฺชา จ, เต จ สงฺคณฺหิ โส รโห;
อสํคหิโต ทีปมฺหิ, นตฺถิ เตน ยถารหํฯ
[147]
ทาตพฺโพติ กถํ คุนฺน-มหาโร โส วิจินฺติย;
สสฺเส ขีรคเต’ทาสิ, เตสํ เขตฺตสหสฺสเกฯ
[148]
กาฬวาปิมฺหิ โส วาริ-สมฺปาตํ การยิ ถิรํ;
ปุญฺญเมวํ วิธํ ตสฺส, อปฺปเมยฺยํ พหุํ กิรฯ
[149]
ตสฺส ปุตฺโต ตทา อาสิ, ยุวราชา ทิวงฺคโต;
ชาโต เสนาปติ กาเล, อปโร อตฺถิ ทารโกฯ
[150]
ตํ ราชา ราชปุตฺเตหิ, ภีโต ราชารโห อิติ;
มาเรตุํ ตํ น สกฺโกนฺติ, วฑฺฒเปสิ ยถา ตถาฯ
[151]
อรีหิ นคเร รุทฺเธ, ปิตรํ โส กิเรกทา;
อุปสงฺกมฺม ยาจิตฺถ, สงฺคมาวจรํ คชํฯ
[152]
โส ทาเปสิ มหานาคํ, โฆรํ มารกรูปมํ;
กตหตฺถํ พลญฺเจว, สพฺพายุธ วิสารทํฯ
[153]
กาโลยมีติ มนฺตฺวา โส, พนฺธิตฺวา ฉุริกํ ตทา;
กุญฺชรํ วรมารุยฺห, นิกฺขมฺม นครา พหิฯ
[154]
วิทฺธํเสตฺวา พลํ สพฺพํ, ทุชฺชยํ ชยมคฺคหี;
ราชา ทิสฺวา ปสนฺโน ตํ, เสนาปจฺจญฺจ ตสฺส’ทาฯ
[155]
เอโสว กิร คนฺตฺวาน, สพโล เทสมุตฺตรํ;
ปลาเปสิ สเสนํ ตํ, อาทิปาทญฺจ ทปฺปุลํฯ
[156]
พทฺธเวโร ตโต’โหสิ, ทปฺปุโฬ ตมฺหิ สาธุกํ;
มหาอุมฺมารยุทฺธมฺหิ, ทิสฺวา ตมตีโกธวาฯ
[157]
สีฆํ เปเสสิ ตํ หนฺตุํ, หตฺถิมารุฬฺหมตฺตนา;
โอวิชฺฌิย ปลาเปสิ, ตเมส สกทนฺตีนาฯ
[158]
ทิสฺวา ตมติสนฺตุฏฺโฐ, อญฺเญสญฺจ อภาวโต;
รชฺชโยเค อทา ตสฺส, อุปราชตฺตมตฺตโนฯ
[159]
เอวํ วีสติ วสฺสานิ, ทีปเมตํ สุภุญฺชิย;
วิปากํ ปุญฺญกมฺมสฺส, ภุญฺชิตุญฺจ ทิวงฺคโตฯ
[160]
เอวํ อเนเกหิ นเยหิ ถทฺธา;
ชนสฺส ทุกฺเขหิ วิรูปเกหิ;
โภคา วินสฺสนฺติ ขเณ น สพฺเพ;
อโห ตหิํเยว รมนฺติ พาลาฯ
สุชนปฺปสาทสํเวคตฺถาย กเต มหาวํเส
ฉ ราชโก นาม
ฉจตฺตาลีสติโม ปริจฺเฉโทฯ
สตฺตจตฺตาลีสติม ปริจฺเฉท